Share this page

Համաշխարհային բանկի խումբը Հայաստանում նոր խորհրդատվական ծրագիր է մեկնարկում՝ ուղղված կանանց աջակցությանը և աղքատության կրճատմանը

Երևան, Հայաստան, 21-ը դեկտեմբերի, 2017 թ . — Համաշխարհային բանկի խումբը Հայաստանում մեկնարկում է նոր խորհրդատվական ծրագիր՝ ուղղված վայրի բույսերի բերքահավաքում ներգրավված կանանց աջակցմանը, արդյունավետության մեծացմանը, աղքատության կրճատմանն ու տնտեսական աճի խթանմանը։
Հայաստանում գենդերային եռամյա ծրագիրը, որն իրականացվում է IFC-ի՝ Համաշխարհային բանկի քույր կազմակերպության և Համաշխարհային բանկի խմբի անդամ կազմակերպության կողմից, կօգնի կանանց առավել արդյունավետ գործունեություն ծավալել այդ ոլորտում և կամրապնդի նրանց կապերը գնորդների ու արտադրողների հետ։ Վայրի բույսերի բերքահավաքում ներգրավված են հիմնականում կանայք և այն Հայաստանի առավել չքավոր, հատկապես հեռավոր բնակավայրերում ապրող քաղաքացիների եկամտի կենսական աղբյուր է հանդիսանում։ Այսուհանդերձ, դրա արդյունավետությանը խոչընդոտում են մի շարք խնդիրներ, ինչպիսիք են՝ վատ զարգացած արժեշղթաները, որոնք զուգակցվում են ցածր շրջանառությամբ, և շահույթով։
«Հայաստանի երիտասարդ կանանց ասոցիացիա» հասարակական կազմակերպության նախագահ Լիլիթ Ասատրյանն ասում է. «Վայրի բույսերի բերքահավաքի արժեշղթաների զարգացումը Հայաստանի հեռավոր բնակավայրերում ապրողների կենսակերպը բարելավելու մեծ ներուժ է պարունակում։ Սակայն որպեսզի դա  տեղի ունենա, պետք է ներկա մասնատված համակարգը կարգավորել և առավել արդյունավետ դարձնել՝ ստանդարտացնելով հավաքի մեթոդները և ամրապնդելով գնորդների ու շուկաների միջև կապը»։
Ծրագիրը կհամագործակցի «Հայաստանի երիտասարդ կանանց ասոցիացիայի» հետ՝ բիզնեսի թեմայով կրթության, մենթորինգի և կապերի հաստատմանն ուղղված աշխատանքների միջոցով ձեռներեցների հմտությունների բարելավման և արժեշղթաների ներգրավումն ամրապնդելու նպատակով։ Ծրագիրը ՀՀ գյուղատնտեսության նախարարությանը կանոնակարգային դաշտի կարգավորման հարցերում խորհրդատվություն կմատուցի։ Կանոնակարգային բարեփոխումներն արդյունավետ իրականացնելու և որոշումների կայացման գործընթացում կանանց մասնակցությունն ապահովելու նպատակով` ծրագիրը կնպաստի հիմնական շահագրգիռ կողմերի, այդ թվում՝ կանանց բիզնես միավորումների, գնորդների, արդյունաբերական ցանցերի և կառավարության աշխատանքների համակարգմանը։
«Կանանց զբաղվածությունը կենսական կարևորություն ունի տնտեսական զարգացումը խթանելու գործում, ուստի կանանց՝ աշխատաշուկայում մասնակցելու դեպքում Հայաստանը երկկողմանի շահող դիրքում կհայտնվի», - նկատեց IFC-ի Հարավային Կովկասի տարածաշրջանային ղեկավար՝ Յան վան Բիլսենը։ «Այս նոր ծրագրի նպատակն է օգնել ոլորտում ներգրավված կանանց՝ մուտք գործել նոր շուկաներ, աշխատելով առանցքային շահագրգիռ կողմերի հետ, որպեսզի վերացվեն խոչընդոտները և ընդունվեն ոլորտի զարգացմանը նպաստող կանոնակարգեր»։
Հայաստանի գենդերային ծրագիրը ֆինանսավորվում է Ավստրիայի ֆինանսների դաշնային նախարարության և Համաշխարհային բանկի՝ Գենդերային հավասարության բազմադոնոր հովանոցային հիմնադրամի կողմից։
Հայաստանը IFC-ի անդամ է դարձել 1995 թվականին։ Այդ ժամանակից ի վեր, IFC-ն տրամադրել է ավելի քան 480 միլիոն ԱՄՆ դոլար, որից մոտ 118 միլիոնը գոյացել է այլ վարկատուների միջոցներից, ֆինանսավորելով շուրջ 49 ծրագիր մի շարք ոլորտներում, որոնցից են ֆինանսական շուկաները, արտադրությունը, ագրոբիզնեսը, սպասարկումն ու հանքարդյունաբերությունը։ IFC-ն աջակցել է նաև ավելի քան 130 միլիոն ԱՄՆ դոլար արժողությամբ առևտրային գործարքներին՝ առևտրի ֆինանսավորման ծրագրի միջոցով, ինչպես նաև իրականացրել մասնավոր հատվածի զարգացմանն ուղղված խորհրդատվական ծրագրեր։
Համաշխարհային բանկի խմբի մասին
Համաշխարհային բանկի խումբը զարգացող երկրների համար ֆինանսավորման եւ գիտելիքների աշխարհի խոշորագույն աղբյուրներից է: Այն ներառում է հինգ սերտորեն փոխկապակցված կազմակերպություններ. Վերակառուցման և զարգացման միջազգային բանկը (ՎԶՄԲ) և Զարգացման միջազգային ասոցիացիան (ԶՄԱ), որոնք միասին կազմում են Համաշխարհային բանկը, ինչպես նաև Միջազգային ֆինանսական կորպորացիան (ՄՖԿ), Ներդրումների երաշխավորման բազմակողմանի գործակալությունը (ՆԵԲԳ) և Ներդրումային վեճերի կարգավորման միջազգային կենտրոնը (ՆՎԿՄԿ)։ Յուրաքանչյուր հաստատություն առանձնահատուկ դեր է խաղում աղքատության դեմ պայքարի և զարգացող երկրներում մարդկանց կենսամակարդակի բարելավման առաքելության մեջ։ Տես ավելին՝ www.worldbank.org , www.miga.org , և www.ifc.org կայքերում։
Մնացեք մեզ հետ
Ծրագրի հովանավորների մասին լրացուցիչ տեղեկատվություն ստանալու համար այցելեք՝
The Ministry of Finance of Austria: http://english.bmf.gv.at
World Bank's multi-donor Umbrella Facility for Gender Equality: