Share this page

საერთაშორისო საფინანსო კორპორაციის (IFC), საქართველოს საფონდო ბირჟის, სიდას, და გაეროს ქალთა ორგანიზაციის წარმომადგენლებმა თბილისში გენდერული თანასწორობის საკითხებზე იმსჯელეს

თბილისი, საქართველო, 7 მარტი, 2018 — IFC-ის, მსოფლიო ბანკის ჯგუფის წევრის, საქართველოს საფონდო ბირჟის და სხვა პარტნიორების ორგანიზებით, თბილისმა ქალთა საერთაშორისო დღის აღსანიშნავად პირველად უმასპინძლა საერთაშორისო ინიციატივას „დავრეკოთ ზარი გენდერული თანასწორობისთვის“ (Ring the Bell for Gender Equality). მისი მიზანი   ეკონომიკური განვითარებისა და ზრდისთვის გენდერული თანასწორობის მნიშვნელობის ხაზგასმა იყო.
საერთაშორისო კვლევების თანახმად, 2025 წლისთვის მსოფლიოს მთლიანი შიდა პროდუქტი შესაძლებელია დაახლოებით 5.3 ტრილიონი აშშ დოლარით გაიზარდოს, თუკი გენდერული უთანასწორობა ეკონომიკურ საქმიანობაში სულ ცოტა 25 პროცენტით შემცირდება. გლობალური გენდერული უთანასწორობის შესახებ მსოფლიოს ეკონომიკური ფორუმის  2017 წლის ანგარიშის მიხედვით, საქართველომ 2017 წელს 144 ქვეყანას შორის 75-ე ადგილი დაიკავა ეკონომიკურ საქმიანობაში ქალთა მონაწილეობის თვალსაზრისით; ათი წლის წინ კი 41-ე  იყო 115 ქვეყანას შორის.
ღონისძიებაზე იმსჯელეს თუ როგორ უწყობს ხელს ქალთა როლის გაძლიერება კერძო კომპანიების ნაყოფიერების ამაღლებას, რაც საბოლოოდ ეკონომიკურ განვითარებას და სამუშაო ადგილების შექმნას, შემოსავლების ზრდას და განვითარების სტიმულირებას განაპირობებს. ღონისძიებამ  დაახლოებით 70 წარმომადგენელი მოიზიდა კერძო სექტორიდან, სამთავრობო უწყებებიდან და საერთაშორისო ორგანიზაციებიდან.
„ქალთა ეკონომიკური გაძლიერებას მნიშვნელოვანი სარგებლის მოტანა შეუძლია. ბევრმა კვლევამ აჩვენა, რომ ბირჟაზე მოვაჭრე კომპანიებს, რომელთა სამეთვალყურეო საბჭოებში ქალები არიან წარმოდგენილნი, უკეთესი შედეგები აქვთ ვიდრე იმ კომპანიებს, რომელთა საბჭოებში ქალები არ შედიან. მოხარულნი ვართ, შევუერთდეთ საფონდო ბირჟებს მსოფლიოს მასშტაბით, რომლებიც გონივრული ბიზნესსტრატეგიის ფარგლებში  მხარს უჭერენ თანაბარ გენდერულ წარმომადგენლობას სამეთვალყურეო საბჭოებში და ხელმძღვანელ პოზიციებზე“, აღნიშნა საქართველოს საფონდო ბირჟის გენერალურმა დირექტორმა გიორგი ფარესიშვილმა.
თბილისში ჩატარებული ღონისძიება 60-ამდე სხვა ქალაქში ჩატარებული გლობალური კამპანიის ნაწილია, რომელიც  მსოფლიო ბანკის ჯგუფის წევრის საერთაშორისო საფინანსო კორპორაციის (IFC), საქართველოს საფონდო ბირჟის, გაეროს ქალთა ორგანიზაციის (UN Women), სამოქალაქო განვითარების სააგენტოს (CiDA), Global Compact-ის საქართველოს ქსელის სამდივნოს პარტნიორობით შედგა. ნორვეგიის საგარეო საქმეთა სამინისტრომ ღონისძიებას ფინანსური მხარდაჭერა გაუწია,  გაეროს ქალთა ორგანიზაციის პროგრამის მეშვეობით.
„გენდერული უთანასწორობის შემცირება ხელს უწყობს ეკონომიკური ზრდის დაჩქარებას და ბევრი ოჯახის ცხოვრების პირობების გაუმჯობესებას. სწორედ ამიტომ IFC-მ და მისმა პარტნიორებმა გააერთიანეს ძალები კერძო სექტორში ქალი თანამშრომლების, მეწარმეების, მომხმარებლების და ლიდერების ჩართულობის ასამაღლებლად. საქართველო დიდ სარგებელს მიიღებს ამ პოტენციალის ათვისებით ,“ განაცხადა  IFC-ის რეგიონულმა მენეჯერმა სამხრეთ კავკასიაში იან ვან ბილსენმა.  
ეს მეოთხე ღონისძიებაა სახელწოდებით „დავრეკოთ ზარი“, რომელიც მსოფლიო მასშტაბით ორგანიზებულია IFC-ის, მდგრადი საფონდო ბირჟების ინიციატივების,  Global Compact-ის, გაეროს ქალთა ორგანიზაციის, Women in ETF-ის და საფონდო ბირჟების მსოფლიო ფედერაციის მიერ.
IFC-ის შესახებ
IFC-ი, მსოფლიო ბანკის ჯგუფის წევრი და განვითარებაზე ორიენტირებული ყველაზე მსხვილი საერთაშორისო ინსტიტუტია, რომელიც განვითარებად ქვეყნებში კერძო სექტორს უწყობს ხელს. ჩვენ ვმუშაობთ 2,000 ბიზნეს კომპანიასთან მსოფლიოს მასშტაბით და ვიყენებთ სამოცწლიან გამოცდილებას განვითარებისთვის საჭირო შესაძლებლობების შესაქმნელად იქ, სადაც ამის საჭიროება ყველაზე მწვავეა. 2017 ფინანსურ წელს, ჩვენმა გრძელვადიანმა ინვესტიციებმა განვითარებად ქვეყნებში რეკორდულ 19.3 მილიარდ აშშ დოლარს მიაღწია, რაც  მიმართულია კერძო სექტორის ხელშეწყობისკენ იმისათვის, რომ მან გადამწყვეტი როლი შეასრულოს  უკიდურესი სიღარიბის დაძლევასა და საყოველთაო კეთილდღეობის ამაღლებაში. დამატებითი ინფორმაციის მიღება შესაძლებელია ვებ-გვერდზე: www.ifc.org .
შემოგვიერთდით
დამატებითი ინფორმაციის მისაღებად საქართველოს საფონდო ბირჟის შესახებ იხ : www.gse.ge
შემოგვიერთდით:
დამატებითი ინფორმაციის მისაღებად გაეროს ქალთა ორგანიზაციის შესახებ იხ:
დამატებითი ინფორმაციის მისაღებად CiDA-ს შესახებ იხ : www.cida.ge .
შემოგვიერთდით: