Bakı, Azərbaycan, 17 aprel 2018
— Dünya Bankı Qrupu Avropa və Mərkəzi Asiyada kredit hesabatlığını gücləndirmək və maliyyə əlçatanlığını yaxşılaşdırmaq məqsədilə kredit məlumatları təchizatçılarının yeni birliyinin yaradılmasını dəstəkləyir.
Bu gün Bakıda, Dünya Bankı Qrupu və Azərbaycan Respublikası Maliyyə Bazarlarına Nəzarət Palatasının birgə təşkil etdikləri imzalama mərasimində, Avropa və Mərkəzi Asiyada Kredit Məlumatları Təchizatçıları Assosiasiyası rəsmən təsis edildi. Azərbaycan, Belarus, Gürcüstan, Qazaxıstan, Qırğızıstan, Tacikistan, Ukrayna və Özbəkistanı təmsil edən kredit reyestrləri və büroları yeni assosiasiyasının üzvləri oldu.
Dünya Bankı Qrupunun həyata keçirdiyi Azərbaycan – Mərkəzi Asiya Maliyyə İnfrastrukturu Layihəsi yeni assosiasiyasının yaradılması üçün məsləhətçi xidmətləri göstərərək risk idarəetməsi metodologiyalarını təkmilləşdirmək və təcrübə mübadiləsi aparmaq yolu ilə regionda maliyyə infrastrukturunun möhkəmləndirilməsinə yardım edir. Layihə Beynəlxalq Maliyyə Korporasiyası (IFC) tərəfindən icra olunur və İsveçrənin İqtisadi Məsələlər üzrə Dövlət Katibliyi (SECO) tərəfindən maliyyələşdirilir.
“Yeni assosiasiya üzv dövlətlərin, o cümlədən Azərbaycanın maliyyə sabitliyinə töhfə verəcək,” – Azərbaycan Respublikası Maliyyə Bazarlarına Nəzarət Palatasının Baş İcraçı Direktoru İbrahim Alışov söylədi. – Müvafiq sahələrdə təcrübə mübadiləsi kredit hesabatlığı sistemlərini yaxşılaşdırmağa və özəl kredit bürolarını inkişaf etməyə, eləcə də maliyyə əlçatanlığı artırmağa kömək edəcək.”
IFC-nin Azərbaycan üzrə Ölkə Nümayəndəsi Aliyə Əzimova qeyd etdi: “Avropa və Mərkəzi Asiya regionunda fəaliyyət göstərən sahibkarlıq subyektləri üçün ən ciddi çağırışlardan biri bank kreditlərinə və digər maliyyə ehtiyatlarına çıxış əldə etməkdir. Səmərəli kredit məlumatları mübadiləsi sistemləri kredit fəaliyyətini təşviq edərək və özəl sektorun inkişafını dəstəkləyərək uzun müddətdə işsizlik və iqtisadi artımın yavaşlaması kimi problemlərin həllinə kömək edirlər.”
Azərbaycan 1995 ildən etibarən Beynəlxalq Maliyyə Korporasiyasının üzvüdür. Ötən dövr ərzində IFC Azərbaycanın maliyyə xidmətləri, infrastruktur və sənaye kimi bir sıra iqtisadi sahələrində icra edilmiş 56 uzun-müddətli layihəyə 473 milyon ABŞ dolları (o cümlədən digər kreditorlardan cəlb edilmiş 73 milyon dollar) məbləğində yatırımlar edib. Bundan əlavə, IFC ticarətin maliyyələşdirilməsi proqramı vasitəsilə 100 milyon dollar civarında ticarət dövriyyəsini dəstəkləyib və Bakı – Tbilisi – Ceyhan boru kəmərinin inşa edilməsinə 250 milyon dollar ayırıb. IFC həmçinin özəl bölmənin inkişafını dəstəkləmək məqsədilə müxtəlif məsləhətçi xidmətləri layihələri icra edib.
Dünya Bankı Qrupu haqqında
Dünya Bankı Qrupu (DBQ) inkişafda olan ölkələr üçün dünyada ən iri vəsait və bilik qaynaqlarından biridir. DBQ bir-biri ilə sıx əlaqəli olan beş təsisatdan ibarətdir: birlikdə Dünya Bankını təşkil edən Beynəlxalq Yenidənqurma və İnkişaf Bankı (ingiliscə ixtisarı IBRD) və Beynəlxalq İnkişaf Assosiasiyası (IDA); Beynəlxalq Maliyyə Korporasiyası (IFC); Çoxtərəfli İnvestisiya Zəmanəti Agentliyi (MIGA) və İnvestisiya Mübahisələrinin Həlli üzrə Beynəlxalq Mərkəz (ICSID). Hər bir təsisat yoxsulluqla mübarizə və inkişafda olan ölkələrdə həyat səviyyəsinin artırılması vəzifəsinə özünəməxsus töhfəsini verir. Daha ətraflı məlumat üçün internet saytlarımızla tanış olun:
www.worldbank.org
,
www.miga.org
və
www.ifc.org
.
Dünya Bankının və IFC-nin Azərbaycanda gördüyü iş barədə daha ətraflı məlumat əldə etmək üçün bu saytları ziyarət edin:
Bizi Facebook-da izləyin