Washington, D.C., 17. september. 2008
– Alþjóðalánastofnunin (IFC), hluti af Alþjóðabankanum, skrifaði í dag undir samning við Global Reporting Initiative (GRI) um að hleypa af stokkunum 12 mánaða rannsóknar- og samráðsverkefni. Markmiðið með samningnum er að aðstoða einkafyrirtæki á heimsvísu við að skapa ný tækifæri fyrir konur, nýta sér bestu starfsvenjur við skýrslugerð um árangur þeirra á sviði sjálfbærrar þróunar og bæta afkomu og rekstur þeirra.
Verkefnið á að aðstoða við gerð handbókar um innleiðingu kynjasjónarmiða í sjálfbærniskýrslur fyrirtækja og er ætlunin að nota megi handbókina við gerð slíkra skýrslna sem gerðar eru í samræmi við aðferðarfræði GRI um gerð sjálfbærniskýrslna. Aðferðarfræði GRI við gerð sjálfbærniskýrslna af þessu tagi er útbreiddasta og þekkasta aðferð til að veita upplýsingar um aðra þætti í rekstri fyrirtækja en fjárhagslega og byggir hún á að því að tengja þætti sem auka á sjálfbærni fyrirtækja við mælikvarða sem stuðlað geta að bættum árangri þeirra.
Þessi nýja handbók verður ætluð þeim fyrirtækjum sem vilja ganga lengra og sýna fram á að þau séu í forystu á sviði kynjamála. Hún mun útskýra og sýna fram á virði þess fyrir fyrirtækið að fjalla um kynjamál og skýra frá þeim, veita fyrirtækjum leiðbeiningar um hvernig þau geti betur stýrt kynjasjónarmiðum með gerð sjálfbærniskýrslna og hjálpa til við að auka gæði og umfang upplýsinga um kynjamál með því að notast við nýja upplýsingaflokka svo sem konur sem neytendur, konur sem frumkvöðlar í aðfangakeðjunni og konur sem hluti af samfélaginu.
Í tilefni undirritunarinnar sagði Rachel Kyte, varaforseti IFC að: “með því að innleiða kynjasjónarmið inn í núverandi skipulag skýrslna um samfélagslega ábyrgð fyrirtækja er fyrirtækjum gert kleyft að öðlast viðurkenningu sem leiðandi aðilar á sviði fjölbreytileika, jafnt frá starfsmönnum þeirra sem fjárfestum og neytendum. Frá viðskiptasjónarmiðum eru kostir þess að fjalla um kynjamál í rekstri fyrirtækja ótvíræðir, þar sem sýnt hefur verið fram á að það hjálpar fyrirtækjum við að ráða konur til starfa, halda í starfskrafta þeirra og hvetja þær þá áfram, samhliða því að konur fá tækifæri til að njóta góðs af breyttu hugarfari. Rannsóknir hafa einnig sýnt að framsetning kvenna í stjórnunarstöður er tengd við jákvæðan fjárhagslegan árangur fyrirtækja.”
“Ávinningurinn af því að bæta kynjasjónarmiðum við sjálfbærniskýrslur er skýr. Með samstarfinu sínu við IFC er GRI að svara aukinni eftirspurn frá markaðnum. Með víðtæku samráði við alþjóðlega samstarfsaðila, munum við geta boðið upp á praktískar leiðbeiningar um framsetningu kynjasjónarmiða við gerð sjálfbærniskýrslna” sagði Sean Gilbert, yfirmaður skýrslugerðarsviðs GRI.
Þetta verkefni, sem ríkisstjórnir Íslands, Sviss og Þýskalands eru helstu styrktaraðilar að, er hluti stærra samstarfs IFC/GRI sem miðar að því að aðstoða fyrirtæki við að tileinka sér sjálfbærniskýrslur sem leið til að bæta árangur í umhverfis-, samfélags- og rekstrarmálum.
Um Alþjóðalánastofnunina
IFC er hluti Alþjóðabankans og skapar tækifæri fyrir fólk til að snúa baki við fátækt og bæta lífskjör sín. Markmið okkar er að stuðla að sjálfbærum efnahagslegum vexti í þróunarlöndunum með því að fjármagna fjárfestingar hjá einkaaðilum, stuðla að framboði fjármagns en einnig að veita ráðgjöf og þjónustu til að lágmarka áhættu fyrirtækja og yfirvalda. Á fjárhagsárinu 2008 samsvöruðu fjárfestingar okkar 16,2 milljörðum dollara sem er 34% aukning frá fyrra ári. Frekari upplýsingar er að finna á
www.ifc.org
.
Um GRI
GRI er samstarfsnet mörg þúsund einstaklinga frá yfir 60 löndum um allan heim sem koma frá fyrirtækjum, félagasamtökum, launþegasamtökum og frá sérfræðifyrirtækjum. GRI hefur unnið að því að þróa, bæta og styrkja aðferðafræði við gerð sjálfbærniskýrslna á heimsvísu. Meginmarkmið með starfi GRI er að stuðla að því að skýrslugerð fyrirtækja um efnahagsleg-, umhverfisleg-, og samfélagsleg áhrif þeirra verði jafn algeng og sambærileg eins og hefðbundin reiknisskil þeirra. Frekari upplýsingar er að finna á heimasíðu GRI
www.globalreporting.org
.
