Հայաստան, Երևան, 2022 թ. Մայիսի31. Հայաստանում գերարագ ինտերնետի հասանելիությունը լավացնելու և թվային տնտեսության կայացմանն օժանդակելու նպատակով Միջազգային ֆինանսական կորպորացիան (IFC) 20 միլիոն դոլար վարկ է տրամադրելու Team Telecom Armenia-ին` երկրի բջջային և ֆիքսված լայնաշերտ կապի ամենախոշոր օպերատորին: Սա կլինի IFC-ի առաջին ներդրումը Հայաստանի և ընդհանրապես Հարավային Կովկասի տարածաշրջանի հեռահաղորդակցության ոլորտում:
Քովիդ-19 համավարակի արդյունքում հուսալի բջջային և ֆիքսված լայնաշերտ կապի ապահովումը դարձավ առաջին անհրաժեշտության ծառայություն, որի շնորհիվ օգտատերերը կարողանում են օգտվել տեղեկատվական, առողջապահական, կրթական ու հանրային ծառայություններից: Բացի այդ, գերարագ լայնաշետ կապի ենթակառուցվածքը, լինելով թվային տնտեսության գրավական, տնտեսության աճի ու նորարարության շարժիչն է և հնարավորություններ է բացում թվային ֆինանսական ծառայությունների ու էլեկտրոնային առևտրի համար:
IFC-ի կողմից Team Telecom Armenia-ի վարկավորումը նպատակ ունի օգնել Հայաստանին` իրացնելու այս նոր հնարավորությունները` ավելի լավ լայնաշերտ կապի հասանելիության միջոցով, այդ թվում` գյուղական շրջաններում: Լրացուցիչ ֆինանսավորում է տրամադրվելու Վերակառուցման և զարգացման եվրոպական բանկի (EBRD) և Ամերիաբանկի կողմից` այսպիսով ֆինանսավորման փաթեթի ընդհանուր ծավալը հասցնելով 45 միլիոն դոլարի:
Ֆինանսավորման փաթեթը կօգնի կազմակերպությանը վերաֆինանսավորել առկա պարտքը և ֆինանսավորել կապիտալ ներդրումների ծրագիրը, որը կլավացնի հեռահաղորդակցության ցանցերի ծածկույթն ու ծառայության որակը, այդ թվում նախատեսվում է 4G բջջային ցանցի ընդլայնում և մանրաթելային հասանելիության ցանցի տարածում հանրապետությունում: Մոտավորապես 2.9 միլիոն բնակչություն ունեցող երկրում ակնկալվում է, որ այս ծրագրի շնորհիվ նվազագույնը 1.1 միլիոն բջջային կապի բաժանորդ կունենա ավելի արագ ու ավելի որակյալ ինտերնետային կապ, իսկ 450,000 տնային տնտեսություններ` ավելի արագ մանրաթելային կապի տեխնոլոգիայից օգտվելու հնարավորություն:
Team Telecom Armenia-ի տնօրենների խորհրդի նախագահ և համահիմնադիր Ալեքսանդր Եսայանը նշել է. « Մենք ողջունում ենք մեր երկարաժամկետ գործընկերությունն IFC-ի հետ, հատկապես վերջին շրջանում տեղի ունեցող գլոբալ զարգացումների ֆոնին, երբ ներդրումները ռիսկային են։ Այս աջակցությունը Team-ին հնարավորություն կտա արագացնել կապիտալ ներդրումների ծրագիրը, ընդլայնել ու արդիականացնել ինչպես ֆիքսված, այնպես էլ շարժական ցանցերը՝ բարելավելով անհատ բաժանորդներին, բիզնես հաճախորդներին տրամադրվող ծառայությունների որակն ու խթանելով նորարարությունը և տնտեսական աճը»:
IFC-ի ֆինանսավորումը նաև կօգնի ընկերությանն ամրապնդել իր դիրքը մեծածախ սեգմենտում, որտեղ տվյալների փոխանցման ծառայություններ է տրամադրում Հայաստանի տեղական ու մարզային հեռահաղորդակցության օպերատորներին` այս կերպ նպաստելով ավելի կայուն և ավելի արագ ինտերնետային ենթակառուցվածքին: Ցանցի արդիականացման արդյունքում նաև ակնկալվում է էներգիայի սպառման ծավալների կրճատում. այսինքն` բաժանորդները հնարավորություն կունենան հանրապետությունում գերարագ ինտերնետ կապից օգտվել ավելի էներգախնայող հեռահաղորդակցության ենթակառուցվածքի միջոցով:
IFC-ի ենթակառուցվածքների և բնական պաշարների հարցերով տարածաշրջանային տնօրեն Շերիլ Էդելսոն Հանվեյը նշում է. «IFC-ի ներդրումը կօգնի արդիականացնել բջջային կապի ծառայությունները և մեծացնել ինտերնետային կապի արագությունը Հայաստանում` այս կերպ խթանելով երկրի թվային տնտեսության, առևտրի և ձեռներեցության զարգացումը և արագացնելով հետքովիդային վերականգնումը: Ֆինանսավորելով ՀՀ թվային ենթակառուցվածը` IFC-ն կօգնի նպաստավոր միջավայր ստեղծել երկրում լրացուցիչ ներդրումների և աշխատատեղերի ստեղծման համար»:
IFC-ն հեռահաղորդակցության, մեդիայի և տեխնոլոգիական ոլորտի առաջատար է զարգացող շուկաներում: Ավելին իմացի՛ր այստեղ:
IFC-ի մասին
Համաշխարհային բանկի խմբի անդամ IFC-ն զարգացման ամենախոշոր հաստատությունն է, որի ուշադրության կենտրոնում զարգացող շուկաների մասնավոր հատվածն է: Աշխատելով աշխարհի ավելի քան 100 երկրներում` մենք օգտագործում ենք մեր կապիտալը, գիտելիքներն ու ազդեցությունը զարգացող երկրներում շուկաներ և հնարավորություններ ստեղծելու համար: 2021 ֆինանսական տարում IFC-ն ռեկորդային 31.5 միլիոն է հատկացրել զարգացող երկրների մասնավոր ընկերություններին ու ֆինանսական հաստատություններին` լծակավորելով ծայրահեղ աղքատությունը վերացնելու և համատեղ բարգավաճում ապահովելու մասնավոր հատվածի ներուժը, մինչ տնտեսությունները չեզոքացնում են կորոնավիրուսային համավարակի հետևանքները: Լրացուցիչ տեղեկությունների համար այցելե՛ք www.ifc.org կայքէջը:
Հետևե՛ք մեզ հետևյալ կայքերում.
www.facebook.com/IFCwbg
www.twitter.com/IFC_org
www.youtube.com/IFCvideocasts
www.ifc.org/SocialMediaIndex
www.instagram.com\ifc_org
www.ifc.org/tmt
www.ifc.org/infrastructure
IFC Infrastructure on LinkedIn
Team Telecom Armenia-ի մասին
Team Telecom Armenia-ն ֆիքսված կապի առաջատար օպերատոր է Հայաստանում, իսկ բջջային կապի ոլորտում երկրի երկրորդ խոշոր օպերատորն է: Ընկերությունըտրամադրում է լայնաշերտ ինտերնետային կապ, IPTV, բջջային և ֆիքսված հեռախոսակապի ծառայություններ ողջ Հայաստանում:
Team Telecom Armenia-ն համահայկական բրենդ է և ունի 2,000 մասնագետներից կազմված հզոր թիմ: Մեկտեղելով ստեղծարար միտքն ու անսպառ հնարավորությունները տեխնոլոգիաների ոլորտում` ընկերությունը կառուցում է ամենաառաջադեմ ցանց տարածաշրջանում և մեկնարկում ժամանակակից ու նորարարական պրոդուկտներ` նպաստելով բարձր տեխնոլոգիական և հեռահաղորդակցային ոլորտների զարգացմանը:
